PROXECTO DE HORTAS URBANAS DA AGRA
Grupo de traballo do 15M Agra do Orzán
Introducción :
Desde hai anos en distintas cidades do mundo -Londres, Nova York, A Habana, Barcelona, Madrid, México, etc- veñen existindo hortas urbanas, moitas delas de propiedade municipal, cada vez máis consolidadas no ámbito cidadán, polos seus éxitos participativos, ambientais, educativos, produtivos
e económicos. Tamén as cidades próximas de Santiago de Compostela -barrios de San Pedro e de Conxo- e de Lugo -Río Rato- manteñen as súas hortas urbanas municipais desde hai tempo cun grande seguimento popular. A cidade da Coruña aínda carece destes actualísimos espazos de relación social, naturais e produtivos. A zona proposta neste proxecto de “Hortas Urbanas da Agra” é idónea para a agricultura, ten unha elevada densidade de poboación circundante e é relativamente céntrica na cidade da Coruña. A zona da Agra do Orzán conta cun “Plan Urban” de 11 millóns de euros, con diñeiro aínda sen gastar. Entre os obxectivos e consideracións do “Plan Urban” da Agra aparecen os seguintes, estreitamente relacionados cun proxecto como o das “Hortas Urbanas da Agra” que apresentamos:
-Diversificar e desenvolver a actividade económica.
-Promover a cultura de proximidade.
-Favorecer o uso de espazos como lugar de encontro, contribuíndo a dar cohesión e integración social.
-Evitar a degradación urbana e mellorar a o medioambiente urbano.
-Establecer outros modelos de consumo.
-Desenvolver o espírito emprendedor. Lembramos tamén como opinión relevante a que manifestaba hai uns días o Premio Nobel de Economía Paul Kurgman, que perante a falta presente de investimentos privados, deberían ser os gobernos os que adopten políticas expansivas e de criación de emprego. E mellor desenvolver este tipo de proxectos que asfaltar unha e outra vez as mesmas rúas. Obxectivos das “Hortas Urbanas da Agra”:
-Mellorar a relación humana entre os habitantes da cidade, das diversas xeracións e procedencias.
-Realizar unha actividade física saudábel e recomendábel para todas as idades en contacto coa natureza.
-Desenvolver unha actividade produtiva e sustentábel, xerando alimentos dunha maneira ecolóxica e cos mínimos custos enerxéticos e de transporte.
-Facilitar o consumo posterior de alimentos frescos, sans e ecolóxicos.
-Mellorar as condicións de vida e económicas da poboación, especialmente dos colectivos máis desfavorecidos e afectados pola crise, reducindo os seus gastos económicos de supermercado.
-Xerar incluso na mesma cidade recursos e emprego por medio da agricultura ecolóxica, coa venda dos excedentes e a criación dalgunha cooperativa agrícola. Zona de actuación:
As Hortas Urbanas da Agra estarían situadas no espazo comprendido entre o Parque Infantil dos Mariñeiros, o Centro Ágora, a Terceira Ronda e barrio de San Pedro de Visma, en terreos de propiedade municipal ou en privados através do banco de terras. Trátase dun espazo cunhas condicións edafolóxicas excelentes para a agricultura, como denota o uso agrícola persistente que tivo desde tempo inmemoral. Tamén conta con recursos hídricos propios, situados na parte máis alta da zona: arqueta da antiga traída de auga da cidade. A situación desta fonte, con augas de coñecida calidade, evita no futuro rego o gasto de auga da traída actual e calquer gasto en electricidade para a súa elevación. Alén diso, existen diversos pozos na súa contorna. Obras necesarias e materiais:
-Espazo de hortas cerrado ao exterior cunhas vallas metálicas situadas nunha base de cemento e cunha ou varias portas metálicas para o acceso.
-Construción de regos e de alxibes.
-Casetas de madeira para guardar ferramentas e sementes, e que sirvan de vestiarios.
-Colocación de varios composteiros.
-Ferramentas e fornecemento de sementes.
-Marcos de madeira que sinalen os lindeiros de cada horta, de 30 a 40 m2. Protocolo de actuación:
-Se nalgunha parte se utilizan terras de propiedade privada pedir a colaboración da Consellería de Agricultura da Xunta através do seu Banco de Terras.
-Elaboración dun baremo para solicitar unha parcela, baixo o compromiso de traballala, tendo en conta a proximidade da vivenda e as circunstancias económicas e de desemprego do interesado/a.
-Anuncio da convocatoria de solicitude por un ano.
-Publicación dunha listaxe ordenada co nome das persoas ás que se lle adxudicou o uso anual dunha horta, determinándoa, e deixando tamén unha listaxe para posíbeis substitucións.
-Asesoramento de veciños/as con experiencia agrícola ou celebración dalgúns cursiños.
-Organización de dúas mostras-feiras anuais dos produtos obtidos na explanada do Parque dos Mariñeiros.
