18/02/2022
☀️Нартай сайхан өдрийн мэндийг хүргэе ээ. Улирал солигдох явцад хүний биеийн дархлаа мууддаг байна. Иймд та бүхэнд дархлаагаа дэмжих энгийн аргуудыг санал болгож байна.
🚶♂️Агаарт алхах
Хүчил төрөгчийн тусламжаар эсүүд энерги үүсгэж оршин тогтнодог. Дархлааны эсүүдийн ажлын чадамж ч хүчил төрөгчөөс шууд хамааралтай. Тиймээс өдөр бүр эрүүл агаарт гарах, өрөөндөө үе үе агаар салхи оруулж агаарын солилцоо хийх нь чухал.
Мөн агаарт алхахад нарны гэрлийн нөлөөгөр бидний тархинд серотонин гэх аз жаргалын даавар ялгардаг. Серотонин нь таныг баяр хөөртэй байлгахаас гадна таны дархлааг бас идэвхжүүлдэг. Серотониноос Мелатонин гэх нойрны даавар үүсдэг. Ө.х. баяр хөөртэй байх тусам шөнөдөө илүү сайн нойрсож чадна. Тиймээс өдрийн цагаар гадаа гарч мандаж, жаргаж буй нар харж байвал сайн.
🧘♀️Дасгал хөдөлгөөн
Биеийн тамир бол бие чийрэгжүүлэх маш сайн арга гэдгийг хүн бүр мэднэ. Хөдөлгөөн хийснээр маш олон ашигтай процессууд хүний биед явагддаг. Цусны урсгал түргэсэх, цус төлжилт сайжрах, мөн бодисын солилцоо сайжирдаг. Гэхдээ дасгал хэт их хийвэл эсрэгээр дархлаанд сөргөөр нөлөөлнө. Өдөр бүр ,олон цагаар , хэт хүндээр дасгал хийвэл биеийн эрдэс витамины нөөцийг хурдан дуусгадаг. Тиймээс өөрт тохирсон дасгал өдөр бүр дор хаяж 30 минут хийх хэрэгтэй.
🥤Ус уух
Хүний биеийн дархлааны систем гэдэг бол хүний биеийн зэвсэгт хүчин юм. Бие дотор дархлааны эсүүд цус тунгалгын усан орчинд сэлж байлдах газраа очдог. Тиймээс цус шингэн байх нь ач холбогдолтой. Эс дотор үүссэн бодисын солилцооны хог шаар, үрэвслийн тулаанд үрэгдсэн эсүүдийг усаар дамжуулж цэвэрлэж биеэс гадагшлуулдаг. Шээс , өтгөн, нус, цэр, хөлс бүгд бие цэвэрлэх замууд. Ус бага багаар их хэмжээтэй уух нь чухал.
🥗Эрүүл зөв хооллолт
Эрүүл хооллолт гэдэг нь чанга хатуу хоолны дэглэм барих, хэтэрхий туранхай байх, хоол хүнснийхээ хэрэглээг хязгаарлаж, дуртай хоол хүнснээсээ татгалзана гэсэн үг биш юм. Харин хоол, хүнсээ зөв сонгон, зохистой бэлтгэн хэрэглэж, түүгээрээ дамжуулан таатай мэдрэмж, эрч хүч авах явдал билээ. Эрүүл хооллолт нь хоол хүнсээ зөв танин мэдэх, зөв хооллох дадалд суралцах, эзэмшихээс эхлэх бөгөөд Таны юу идэж байгаа төдийгүй, ямар хэмжээгээр идэж байгаагаас ихээхэн шалтгаална. Хоол хүнснийхээ зүйлийг зөв сонгож, зохистойгоор хэрэглэх нь зүрх судасны өвчин, хавдар, чихрийн шижин зэрэг өвчнөөр өвдөх эрсдэлийг багасгах төдийгүй, сэтгэл санааны хямралд орохоос урьдчилан сэргийлж чадна. Үүний зэрэгцээ зөв хооллож сурснаар Таны эрүүл мэнд, ой ухаан сайжирч, эрч хүч нэмэгдэж, сэтгэл санаа тань тогтвортой болно.
🌞Витамин Д
Нарны гэрлийн нөлөөгөөр нийлэгждэг энэ витамины дутагдал Монголд өвөл хаврын цаг буюу 12,1,2,3 сард Д витамины хамгийн бага түвшинд очдог эдгээр саруудад томуугийн дэгдэлт дээд цэгтээ хүрдэг. Тиймээс энэ саруудад уудаг Д витаминыхаа тунг нэмэхэд илүүдэхгүй. Зуны цагт ч гэсэн Д витамин хэрэглэхээ зогсоох хэрэггүй. Олон судалгаанууд Д витамин ханиад томуунд өртөлтийг багасгадгийг нотолсон. Д витаминыг хамгийн хүчтэй дархлаа дэмжигч ч гэж бас нэрлэдэг.
🥑Ашигтай бактер ба гэдэс
Таны дархлааны эсүүдийн 70-80% нь гэдэс дотор байдаг. Таны дархлааны цөм бол таны гэдэс юм. Тиймээс гэдсэнд ээлтэй хоол хүнс хэрэглэх.2 идэхгүй хоосон хонохгүй зарчмаар хооллож гэдсээ амрааж байвал таны дархлаанд ч мөн адил сайнаар нөлөөлнө. Хэт их идсэнээр гэдэс хоол боловсруулах болон хүнсээр орж ирсэн гадны биетүүдийг устгах гээд хэт завгүй ажиллаж эхэлдэг. Ерөнхий дархлааг сайжруулья гэвэл гэдсэндээ бага ачаалал өг. Мөн гэдсэнд сайн ашигтай нян агуулсан синбиотикийн бэлдмэл хэрэглэх хэрэгтэй. Ялангуяа монголчууд эрт дээр үеэс тарагийг бүрж шинэхнээр нь хэрэглэж байсан нь биед хэрэгтэй ашигтай бактериа хоол хүнснээсээ авч дархлаагаа дэмждэг байсан байна.
👩🔬Сэтгэл засал эмчилгээ
Манай ард түмний дунд сэтгэл зүйн тугламдсан асуудлыг сэтгэцийн өвчин туссан мэтээр ойлгож ямар үед сэтгэлзүйчид хандахаа мэдэхгүйгээс харин ёстой жинхэнэ сэтгэцийн өвчтэй болж байна. Сэтгэлзүйн таагүй байдал стрессээ хэрхэн тайлах, даван туулахаа мэдэхгүй байгаа бол та сэтгэлзүйчид нэг хандаад үзэхэд илүүдэхгүй болов уу.
💆Бариа засал /массаж/
Бариа засал нь хүний биеийн гадаргуу дээр байх суваг хэрдэсийн дагууд илэх, нухах, үрэх, чичиргэх, доргиох аргаар арьсан доорх өөхөн эд, булчин, шөрмөс, хөлс, тосны булчирхайд сэдээлт өгч улмаар мэдрэлийн ширхэгүүдийг тайвшруулах, бичил цусны эргэлтийг сайжруулах, булчин сулруулах, өвдөлт намдаах үр дүнтэй засал юм.
